បន្ទាយមានជ័យ៖ រដ្ឋមន្រ្តីក្រសួងអប់រំយុវជន និងកីឡា លោក ហង់ ជួនណារ៉ុន លើកឡើងថា ការកសាង បណ្តុះបណ្តាលធនធានមនុស្សជាកត្តាសំខាន់ជាងគេ និងជាបញ្ចាកោណទី១ ដែលប្រមុខរាជរដ្ឋាភិបាល បានដាក់ចេញ ដើម្បីធានាបានធនធានមនុស្សប្រកបដោយគុណភាព។

លោក ហង់ ជួនណារ៉ុន ថ្លែងបែបនេះនៅក្នុងឱកាសបំពេញបេសកកម្មនៅខេត្តបន្ទាយជ័យ នៅថ្ងៃទី៣០ ខែសីហា ឆ្នាំ២០២៣។ លោកបញ្ជាក់ថា៖ «ជាចក្ខុវិស័យក្រសួងអប់រំ យុវជន និងកីឡា បានសម្រួចនូវអាទិភាពការធ្វើកំណែទម្រង់ ជាពិសេសក្រោមការដឹកនាំរបស់រាជរដ្ឋភិបាល អាណត្តិទី៧ ដឹកនាំដោយលោកកត្តិទេសាភិបាលបណ្ឌិត ហ៊ុន ម៉ាណែត នាយករដ្ឋមន្ត្រីនៃកម្ពុជា។

លោកបានឱ្យដឹងទៀតថារដ្ឋាភិបាលបានដាក់ចេញទិសដៅ ចំនុចគន្លឹះសំខាន់ៗរួមមាន ការបន្តពង្រឹងអភិបាលកិច្ចគ្រឹះស្ថានសិក្សាពីមត្តេយ្យដល់វិទ្យាល័យ និងការពិនិត្យឡើងវិញនូវកម្មវិធីសិក្សា ដើម្បីលើកកម្ពស់វិស័យអប់រំ ចរិយាធម៌ ព្រមទាំងការលើកកម្ពស់សុខភាពសិក្សា អាហារូបត្ថម្ភ របស់សិស្សានុសិស្ស ក៏ដូចជាសុខភាពរបស់លោកគ្រូ-អ្នកគ្រូ រួមទាំងការបង្កើតភាពជាដៃគូរវាងរដ្ឋ និងសហគមន៏ដើម្បីការអប់រំផងដែរ។

ជាមួយគ្នានោះ រដ្ឋមន្ត្រីក្រសួងអប់រំ យុវជន និងកីឡា ក៏បានជម្រុញណែនាំបន្ថែមដល់គ្រប់សាលារៀនត្រូវយកយកចិត្តទុកដាក់ទៅលើសុវត្ថិភាពចំណីអាហារ ជាពិសេសតាមបណ្តាសាលា ត្រូវធ្វើការផ្សព្វផ្សាយឱ្យបានផុសផុលដល់គ្រប់សាលារៀន អាណាព្យាបាល បានយល់ច្បាស់ពីសុវត្ថិភាពអារហារដល់កូនៗដែលកំពុងសិក្សានៅតាមសាលារៀន មិនត្រូវឱ្យមានការចំណីអាហារ ដែលឱ្យប៉ះពាល់ដល់សុខភាពសិស្សឡើយ៕